Hraðbankinn ekki færst úr stað

Lögreglu hefur ekki tekist að hafa uppi á aðilanum sem reyndi að stela hraðbanka á Tjarnarvöllum í Hafnarfirði í nótt.

Frétt af mbl.is

Reyndi að stela hraðbanka í Hafnarfirði

Tilkynning um atvikið barst um klukkan hálf þrjú og mátti sjá á vettvangi að búið var að binda reipi við afturenda bifreiðar og í hraðbankann.

Ljósaskilti hafði farið af hraðbankanum en hann hafði þó ekki færst úr stað. Ekki varð tjón á hraðbankanum að öðru leyti.

Skoða hvort bílnum hafi verið stolið

Bifreiðin var mannlaus þegar lögreglu bar að garði og er því ekki vitað hver hafði verið að verki. Málið er nú í rannsókn.

„Við eigum eftir að athuga með eiganda bílsins og sjá hvernig það þróast, hvort þessum bíl hafi verið stolið eða ekki,“ segir Skúli Jónsson, aðstoðaryfirlögregluþjónn hjá lögreglunni á höfuðborgarsvæðinu, í samtali við mbl.is.

• Blogga um frétt