Ungmenni kveiktu í inni á salerni

Lögreglunni á höfuðborgarsvæðinu barst tilkynning um ungmenni sem voru að kveikja í inni á almenningssalerni í Breiðholti. Ungmennin voru farin þegar lögreglu bar að.

Þetta kemur fram í dagbók lögreglu sem nær yfir útköll í gærkvöldi og í nótt.

Í miðbænum var óskað eftir aðstoð lögreglu að veitingahúsi, en þar var einstaklingur sem neitaði að borga fyrir reikninginn sinn og óskaði sjálfur eftir aðkomu lögreglu. Aðilinn var fluttur á lögreglustöð þar sem honum var tilkynnt að hann yrði kærður fyrir fjársvik og yrði laus að því loknu.

Sveiflaði hníf

Þá barst lögreglu tilkynning um aðila sem var að sveifla hníf í miðbænum. Var hann handtekinn þar sem hann var grunaður um vopnalagabrot. Hann var vistaður í fangageymslu í þágu rannsóknar málsins.

Í miðbænum var einnig tilkynnt um slagsmál en það reyndist vera falsboð. 

Bifreiðin hringdi í 112

Lögregla fékk símtal um að ekið hefði verið á húsnæði í Kópavogi. Í dagbók lögreglu segir að við höggið hafi bifreiðin hringt í 112. Minniháttar eignartjón hlaust af atvikinu.

Í Kópavogi var einnig tilkynnt um veiðiþjófnað. Er lögreglumenn komu á vettvang hittu þeir einn aðila og var honum kynnt að það mætti ekki veiða í ánni. Hann var þó ekki með neinn afla og er því laust allra mála.

Bifreið upp á grjóti

Þá var tilkynnt um bifreið uppi á grjóti til lögreglu. Haft var samband við skráðan eiganda sem kvaðst ætla að gera viðeigandi ráðstafanir varðandi bifreiðina. Í dagbók lögreglu kemur ekki fram hvar bifreiðin var.

Í Mosfellsbæ var óskað eftir aðstoð lögreglu vegna ökumanns sem hafði fest bifreið sína. Bifreiðin var losuð með dráttarbifreið og ekið af vettvangi. Ekkert eignartjón varð né slys á fólki.

• Blogga um frétt