Tveir tipparar voru með alla þrettán leikina rétta á enska getraunaseðlinum á laugardaginn.
Fá þeir hvor um sig rúmar þrjár milljónir króna í sinn hlut samkvæmt tilkynningu frá Íslenskum getraunum.
Annar þeirra tippaði á seðil með átta tvítryggðum leikjum og hafði fimm leiki með einu merki. Fékk hann því þrettán rétta án þess að þrítryggja leik. Keypti hann miðann í Lengju appinu samkvæmt tilkynningunni.
Hinn vann á kerfisseðil sem keyptur var í félagakerfi Íslenskra getrauna hjá Íþróttafélagi fatlaðra í Reykjavík en ekki kemur nánar fram hvernig seðillinn var settur saman.
Vinningshafarnir styðja annars vegar Víking og hins vegar Íþróttafélag fatlaðra í Reykjavík.