Innlent | mbl | 25.4.2023 | 12:11 | Uppfært 13:58

Skoða önnur úrræði til að vista ungmenni

Jón Gunnarsson dómsmálaráðherra. mbl.is/Kristinn Magnússon

Fjölgun ofbeldisglæpa meðal ungmenna og úrræðaleysi þegar kemur að vistun ungmenna undir sjálfræðisaldri var á meðal þess sem rætt var á ríkisstjórnarfundi í morgun. Jón Gunnarsson dómsmálaráðherra segir í samtali við mbl.is að ríkisstjórnin geri sér grein fyrir vandanum og vinni að því að bregðast við honum.

Frétt af mbl.is

Heil deild lögð undir einn hinna handteknu

Fjögur ungmenni voru sett í gæsluvarðhald vegna árásar á mann fyrir utan Fjarðarkaup í síðustu viku. Maðurinn lést í kjölfar árásarinnar. Eitt ungmennanna var vistað á deild á Hólmsheiði sem vanalega hýsir fjóra vegna þess að ekki var unnt að tryggja einangrun á Stuðlum.

„Við erum að skoða þessi fangelsismál á fullu og erum að fara í uppbyggingarfasa núna á Litla-Hrauni,“ segir Jón og bætir við að í fjármálaáætlun séu heimildir til þess að fjölga opnum fangelsum.

„Í tengslum við þetta er auðvitað skoðað úrræði fyrir þetta unga fólk.“

Frétt af mbl.is

Umfangsmiklar endurbætur á Litla-Hrauni

Væri til skoðunar að opna sérstaka deild á Litla-Hrauni fyrir ungmenni?

„Nei, ég sé nú ekki fyrir mér að þetta fari endilega inn á Litla-Hraun. Það getur komið úrræði þá frekar í tengslum við opnu fangelsin eða eitthvað slíkt, þar sem væri hægt að sinna þessum verkefnum,“ segir hann og bætir við að vinna að úrlausnum séu gerðar í samvinnu við barnamálayfirvöld.

Jón bendir á að um samstarf margra aðila sé að ræða, svo sem barnaverndar og annarra ráðuneyta.

Ný vopnalöggjöf í vinnslu

Nokkrir ráðherrar ræddu aukinn vopnaburð á samráðsfundi sínum í morgun. Jón nefnir að ný vopnalöggjöf sé að koma fram og að vopnaburður ungmenna verði skoðaður í tengslum við hana.

Frétt af mbl.is

Óttaðist að svona gæti gerst

„Við erum líka að skoða aukið samstarf á milli löggæslunnar og skólayfirvalda. Núna vorum við að ýta af stað átaki innan lögreglunnar sem að snýr að þessari samfélagslöggæslu sem við köllum svo. Það eru einmitt lögreglumennirnir sem fara í skólana og vinna með skólunum.

Síðan þarf þetta að ná inn á heimilin. Þannig að þessi mál eru í heilmikilli skoðun og gerjun og við vorum að fara yfir þetta hér síðast í morgun á vettvangi ríkisstjórnarinnar og á vettvangi þeirra ráðherra sem þetta heyrir undir. Þar er mikið og gott samstarf í gangi og við gerum okkur grein fyrir vandanum og ætlum að reyna bregðast við því,“ segir Jón að lokum.