Lögreglan á höfuðborgarsvæðinu fer fram á fjögurra vikna gæsluvarðhald yfir þremur ungum mönnum sem þegar sæta gæsluvarðhaldi í tengslum við andlát karlmanns í Hafnarfirði í síðustu viku. 

Þetta staðfestir Grímur Grímsson yfirlögregluþjónn í samtali við mbl.is. Mennirnir sættu gæsluvarðhaldi vegna rannsóknarhagsmuna en nú verður farið fram á gæsluvarðhald á grundvelli almannahagsmuna. 

Héraðsdómur Reykjaness dæmir í málinu síðdegis í dag en vikulangt gæsluvarðhald yfir þeim rennur út klukkan fjögur. 

Stúlkunni sleppt fyrr í vikunni

Mennirnir voru handteknir í síðustu viku eftir að maður lést eftir átök á bílastæði Fjarðakaupa á fimmtudag í síðustu viku. Auk þeirra var 17 ára stúlka handtekin en Landsréttur felldi gæsluvarðhald yfir henni úr gildi í byrjun vikunnar.

Einn mannanna sem sætir gæsluvarðhaldi er í fangelsinu á Hólmsheiði en hinir tveir eru vistaðir á Stuðlum sökum ungs aldurs. 

Maðurinn sem lést var á þrítugsaldri og var af pólskum uppruna. Lögregla segir ekkert hafa komið fram við rannsókn málsins sem gefi til kynna að árásin tengist uppruna mannsins. 

Lögregla hefur undir höndum myndefni af árásinni en í tilkynningu fyrr í vikunni sagði að rannsókn miðaði vel áfram og að lögregla teldi sig hafa nokkuð skýra mynd af því sem leiddi til dauða mannsins. 

Tengdar fréttir

Mannslát í Hafnarfirði

Fær 12 ár fyrir manndráp við Fjarðarkaup

• Banamanninum gert að greiða tæpar 30 milljónir
• Stundarbrjálæði vegna 5.000 kr. kostaði annan mann lífið
• Lokuð réttarhöld í manndrápsmáli hefjast
• Manndrápsmál í Hafnarfirði komið til ákærusviðs

» Fleiri tengdar fréttir

• Blogga um frétt