Vorsöfnun Barnaheilla hafin

Í dag hófst hin árlega vorsöfnun Barnaheilla til styrktar Verndurum barna, forvarnaverkefnis gegn kynferðisofbeldi á börnum. Þetta er í fjórtánda sinn sem fjáröflunin fer fram en hefð hefur verið fyrir því að selja ljós í formi lyklakippu. Í ár eru þær hannaðar og handgerðar af listafólki í Síerra Leóne. 18 einstaklingar komu að gerð lyklakippunnar og tók framleiðslan um 4 mánuði.

„Öll fengu þau laun sem samsvaraði árslaunum fyrir vinnu sína,“ er haft eftir Kolbrúnu Pálsdóttur, kynningastjóra Barnaheilla.

Landsliðsstjörnur keyptu fyrstu lyklakippurnar

Tvíburarnir Snædís María Jörundsdóttir og Sigurbergur Áki Jörundsson, sem bæði voru nýlega valin í U19 landslið Íslands í fótbolta, keyptu fyrstu lyklakippurnar í söfnuninni en setning söfnunarinnar fór fram í höfuðstöðvum KSÍ fyrr í dag og flutti Vanda Sigurgeirsdóttir, formaður KSÍ, nokkur orð í tilefni dagsins. Þá sýndu danshópar frá Plié Listdansskóla atriði en skólinn eru virkur söluaðili í söfnun Barnaheilla. 

Vanda Sigurgeirsdóttir, formaður KSÍ, flutti nokkur orð við setninguna í dag. Ljósmynd/Aðsend

Vorsöfnunin stendur yfir dagana 28. apríl - 7. maí og er hægt að kaupa lyklakippurnar um land allt hjá sölufólki og inni á vefsíðu Barnaheilla. Lyklakippan kostar 3.000 krónur og rennur allur ágóði sölunnar til Verndara barna, forvarnaverkefnis Barnaheilla sem snýr að námskeiðum og fræðslu um hvernig koma megi í veg fyrir kynferðisofbeldi, þekkja vísbendingar um að ofbeldi hafi átt sér stað eða að möguleiki sé á því að verið sé að undirbúa jarðveg til að brjóta á barni. Á síðasta ári fengu rúmlega þrjú þúsund einstaklingar fræðslu Verndara barna.

Frá setningu vorsöfnunarinnar fyrr í dag. Ljósmynd/Aðsend

• Blogga um frétt