Innlent | Morgunblaðið | 30.4.2023 | 11:59

Þúsundir hafa flust til landsins í ár

Samkvæmt Hagstofunni bjuggu 390.830 manns á landinu í lok fyrsta ársfjórðungs í ár. Það kann hins vegar að vera nokkurt ofmat, eins og Morgunblaðið hefur bent á. Samkvæmt manntali Hagstofunnar bjuggu hér um 359 þúsund manns í ársbyrjun 2021 eða um tíu þúsund færri en áður var áætlað. Var misræmið meðal annars sagt skýrast af því að brottfluttir væru vantaldir. mbl.is/Eggert Jóhannesson

Ríflega 10.300 fleiri erlendir ríkisborgarar fluttu til landsins í fyrra en fluttu þá frá landinu. Það er mesti fjöldi á einu ári í sögu landsins. Á hinn bóginn fluttu 580 fleiri íslenskir ríkisborgarar frá landinu í fyrra en fluttu þá til landsins. Það er enn eitt árið á þessari öld sem brottfluttir íslenskir ríkisborgarar eru fleiri en aðfluttir.

Þróun búferlaflutninga frá aldamótum er hér sýnd á grafi. Skal tekið fram að tölur fyrir fyrsta ársfjórðung eru bráðabirgðatölur.

Graf/mbl.is

Samkvæmt þeim fluttu um 2.800 fleiri erlendir ríkisborgarar til landsins en frá því á fyrstu þremur mánuðum ársins. Hins vegar fluttu um 90 fleiri íslenskir ríkisborgarar frá landinu en fluttu þá til þess.

Frétt af mbl.is

„Vissi ekki að þetta væri að gerast svona hratt“

Graf/mbl.is

Alls hafa nú um 68.400 fleiri erlendir ríkisborgarar flutt til landsins en frá því á þessari öld. Það samsvarar samanlögðum íbúafjölda Kópavogs og Hafnarfjarðar.

Hins vegar hafa ríflega 11 þúsund fleiri íslenskir ríkisborgarar flutt frá landinu en til þess á öldinni. Það fer nærri íbúafjölda Mosfellsbæjar.

Graf/mbl.is

Árið 2022 er sem fyrr segir metár í aðflutningi erlendra ríkisborgara til landsins. Aðfluttir erlendir ríkisborgarar umfram brottflutta voru þá 2.450 fleiri en fyrra metárið 2017 og um tvöfalt fleiri en árið 2007 sem er nú í fjórða sæti hvað þetta varðar.

Nánari umfjöllun er að finna í Morgunblaðinu sem kom út föstudaginn 28. apríl.

Aðfluttir erlendir ríkisborgarar eru fleiri en brottfluttir í öllum landshlutum. Þessu er öfugt farið hjá íslenskum ríkisborgurum en þar eru brottfluttir fleiri en aðfluttir í öllum landshlutum. Langmest munar um höfuðborgarsvæðið í þeim efnum en þaðan fluttu um 7.140 fleiri íslenskir ríkisborgarar frá landinu en til þess á tímabilinu frá 2000 til 2022. Graf/mbl.is