Sinubruni í Ögurhvarfi

Slökkviliðið á höfuðborgarsvæðinu berst nú við sinubruna í Ögurhvarfi í Kópavogi. 

Bílar og mannafli frá tveimur stöðvum hefur verið sendur á vettvang og vinnur slökkviliðið að því að ná utan um brunann. 

Brunasvæðið er enn að stækka.

Uppfært klukkan 16.28: 

Sinubruninn er nú kominn í tré á svæðinu og því hefur þriðji bíllinn verið sendur á staðinn. Eins hefur slökkviliðið beðið um að Breiðholtsbraut verði lokað vegna reyks sem liggur þar yfir. 

Þetta staðfestir Jónas Árnason, varðstjóri hjá slökkviliðinu á höfuðborgarsvæðinu. 

Hann segir mikið af fólki vera í skíðabrekkunni við brunann en það þurfi að gæta að sér. 

„Það á ekkert að vera að vaða inn á svona vettvang því að það er bara þeirra heilsa. [...] Þó þetta sé spennandi á að horfa þá er þetta stórhættulegt,“ segir Jónas og varar við reyknum. Að svo stöddu sé þó ekki þörf á því að íbúar í nágreninu óttist að fá reyk inn um glugga. 

Jónas býst við því að slökkviliðið verði á svæðinu í að minnsta kosti klukkutíma til viðbótar.