Innlent | mbl | 4.5.2023 | 14:59 | Uppfært 5.5.2023 11:04

Loka veginum og vara við mögulegu gasútstreymi

Jökulsprungurnar marka yfirborð Mýrdalsjökuls þar sem hann skríður fram. mbl.is/RAX

Ríkislögreglustjóri og lögreglustjórinn á Suðurlandi hafa lýst yfir óvissustigi vegna jarðskjálfta í Mýrdalsjökli.

Jarðskjálftahrinan í Mýrdalsjökli í morgun er sú öflugasta sem hefur orðið þar í sjö ár, eða síðan í ágúst árið 2016. Ekkert gos varð þá í jöklinum.

Í tilkynningu frá ríkislögreglustjóra er bent á að um sé að ræða óvenju stóra jarðskjálfta, eins og mbl.is hafði þegar greint frá. Því sé rétt að fylgjast vel með framvindunni.

Yfir 30 skjálftar síðan hrinan hófst

Ekki ráðlegt að vera við rætur Kötlujökuls

Segir í tilkynningunni að lögreglan á Suðurlandi hafi í ljósi þessa ákveðið að loka veginum inn að Kötlujökli.

Ekki er heldur talið ráðlegt að vera við rætur Kötlujökuls vegna mögulegs gasútstreymis og hlaupvatns í farvegi Múlakvíslar.

Hvorki hefur þó mælst gosórói né hlaupórói.

Þetta eru líklegir fyrirboðar Kötlugoss

Mælar vaktaðir allan sólarhringinn

„Í kringum Kötlu er mælanet sem samanstendur m.a. annars af jarðskjálfta-, aflögunar- og vatnamælum. Þessir mælar eru vaktaðir allan sólarhringinn af náttúruvársérfræðingum Veðurstofunnar og gefnar út tilkynningar ef snöggar breytingar verða á þeim sem mætti túlka sem skammtímafyrirboða að eldgosi eða jökulhlaupi, t.d. órói á jarðskjálftamælum,“ segir í tilkynningunni.

Þá er ítrekað að slíkur órói sjáist ekki á mælum núna.

„Ekki er hægt fullyrða neitt um það hvernig þróun virkninnar verður og fylgist náttúruvárvöktun Veðurstofunnar áfram náið með málum.“