100 milljarðar í myndum

Verið er að leggja lokahönd á nýtt skrifstofuhús RVK Studios í Gufunesi og af því tilefni sýndi Baltasar Morgunblaðinu salarkynnin.

Baltasar telur raunhæft að uppbyggingu íbúða og atvinnuhúsnæðis í Gufunesi verði lokið eftir fimm ár en hann er þar jafnframt að byggja íbúðir í samstarfi við Spildu.

Hann segir hækkun endurgreiðslu vegna kostnaðar sem fellur til við kvikmyndagerð, úr 25% í 35%, hafa haft mikla þýðingu fyrir greinina á Íslandi. Samkeppnishæfnin hafi styrkst og það, ásamt stórbættri aðstöðu, laði að fleiri verkefni. Raunhæft sé að árlegt útlutningsverðmæti kvikmyndagerðar verði komið í 100 milljarða í ekki svo fjarlægri framtíð.

Vöxtur streymisveitna á þátt í vexti kvikmyndagerðar á Íslandi. Baltasar telur að sú eftirspurn sé komin til að vera en stórfyrirtæki á borð við Amazon og Apple hafi þar haslað sér völl.

Fáir íslenskir listamenn hafa náð viðlíka alþjóðlegum árangri á þessari öld og Baltasar. Spurður hvort hann sé ekki orðinn valdamikill í íslensku listalífi segir hann völd sín, ef einhver séu, felast í samstarfi. „Þau eru algjörlega sjálfsköpuð og felast í því að fólk hefur áhuga á að vinna með mér,“ segir Baltasar sem kveðst opinn fyrir samstarfi við fjárfesta um uppbygginguna sem er fram undan í Gufunesi. Það komi t.d. til greina að stofna hlutafélag í framtíðinni.

Lesa má meira um málið í Morgunblaðinu í dag.