Tekur fyrir fordæmisgefandi fæðingarorlofsmál

Hæstiréttur hefur samþykkt að taka fyrir mál konu sem stefndi íslenska ríkinu vegna ákvörðun Fæðingarorlofssjóðs um að hafna sér um greiðslur í orlofi vegna vinnu sem var unnin utan Íslands.

Héraðsdómur Reykjavíkur hafnaði kröfu konunnar með dómi í lok mars, en konan óskaði eftir því að málið yrði tekið upp beint í Hæstarétti án þess að fara fyrst í gegnum Landsrétt. Vísaði hún meðal annars til þess að úrslit málsins gætu haft verulega almenna þýðingu um beitingu réttarreglna og fordæmisgildi fyrir fjölda einstaklinga sem séu í sömu stöðu og hún.

Frétt af mbl.is

Fær ekki fæðingarorlof vegna vinnu í Danmörku

Er þá vísað til þess að í málinu reyni á hvernig beita skuli reglunni „lex specialis“ sem tryggja eigi einsleitni innan ríkja EES-samningsins.

For­saga máls­ins er sú að kon­an flutt­ist til Íslands í sept­em­ber 2019 eft­ir um fjög­urra ára dvöl í Dan­mörku þar sem hún hafði starfað. Kon­an hóf störf á Íslensk­um vinnu­markaði í sept­em­ber árið 2019 og til­kynnti vinnu­veit­anda um til­hög­un fæðing­ar­or­lofs í janú­ar en barnið fædd­ist í mars. Samþykkti or­lofs­sjóður ein­göngu greiðslur í or­lofi vegna vinnu á Íslandi og námu þær 184 þúsund krón­um á mánuði miðað við 100% or­lof.

Kon­an kærði ákvörðun Fæðing­ar­or­lofs­sjóðs til úr­sk­urðar­nefnd­ar vel­ferðar­mála, og hún staðfesti niður­stöðu Fæðing­ar­or­lofs­sjóðs með úr­sk­urði 2. sept­em­ber 2020.

Hélt konan því fram að Ísland ætti að lúta reglum Evrópska efnahagssvæðisins sem Ísland hefði skuldbundið sig til að fara eftir. Ágrein­ing­ur máls­ins lýt­ur að því hvort líta eigi til tekna sem konan aflaði við störf í Dan­mörku við út­reikn­ing á greiðslum til henn­ar úr sjóðnum.

Niðurstaða héraðsdóms var á þá leið að í lögum um Fæðingarorlofssjóð sé tiltekið að for­eldri öðlist rétt til greiðslna úr fæðing­ar­or­lofs­sjóði eft­ir að hafa verið sam­fellt í sex mánuði á inn­lend­um vinnu­markaði fyr­ir fæðingar­dag barns.

Var því upp­haf­leg ákvörðun Fæðing­ar­or­lofs­sjóðs lát­in standa. Í niðurstöðu Hæstaréttar um áfrýjunarleyfið kemur fram að líta verði svo á að dómur í málinu geti haft fordæmisgildi, almenna þýðingu fyrir beitingu réttarreglna og verulega samfélagslega þýðingu að öðru leyti. Er beiðnin því samþykkt og verður málið tekið fyrir í Hæstarétti.

• Blogga um frétt