Vor í lofti vegna mildra nátta

Einar Sveinbjörnsson veðurfræðingur greinir frá því að hitinn í Reykjavík fór vart niður fyrir 9 stig í nótt. 

„Mildar nætur segja meira um vorkomuna en hæsti hiti dagsins!“ segir Einar í Facebook-færslu veðurvefsins Bliku. 

Í gær spáði hann 16 stiga hita yfir miðjan daginn í dag en Veðurstofa Íslands spáir 12 stigum. Einar segir muninn liggja í skýjafarinu. 

„Þó skýjahulan sé fremur þunn yfir höfuðborgarsvæðinu, bendir flest til þess að sólarlítið verði í dag og væta með köflum síðdegis og í kvöld.“

Þá bendir Einar á að reiknað sé með skilum úr suðvestri snemma á föstudag. „En í kjölfar þeirra er gert ráð fyrir talsvert svalara lofti sem ættað er úr suðvestri og síðar úr vestri. Því er spáð um helgina, en meiri spurning er síðan um framhaldið.“

• Blogga um frétt