Innlent | mbl | 10.5.2023 | 15:00 | Uppfært 11.5.2023 10:16

Íslensk stjórnvöld brjóta gegn EES-reglum

Flugvél hífð upp úr Þingvallavatni í apríl á síðasta ári. ESA telur íslensk stjórnvöld brjóta gegn EES-reglum með því að hafa ekki tekist að sýna fram á formlegt fyrirkomulag um gott samstarf á milli viðeigandi opinberra aðila vegna rannsókna flugslysa. mbl.is/Kristinn Magnússon

ESA, Eftirlitsstofnun EFTA, sendi íslenskum stjórnvöldum rökstutt álit í dag þar sem fram kemur að Íslandi hafi ekki tekist að setja á laggirnar formlegt fyrirkomulag til að tryggja að gott samstarf sé á milli viðeigandi opinberra aðila áður en rannsókn á flugslysum hefst.

Þetta kemur fram í fréttatilkynningu frá ESA.

Annað skrefið í formlegu brotaferli ESA gegn Íslandi

Rökstutt álit er annað skrefið í formlegu brotaferli ESA gegn Íslandi. Íslensk stjórnvöld hafa tvo mánuði til að koma sjónarmiðum sínum á framfæri. Í kjölfarið ákveður ESA hvort málinu verði vísað til EFTA dómstólsins.

Formlegt áminningarbréf var sent til íslenskra stjórnvalda í maí 2022 þar sem Ísland hafði ekki uppfyllt skyldur sínar samkvæmt Evrópureglugerð um rannsóknir slysa og annarra flugatvika.

Tryggja beri skýr hlutverk og skilvirkt samstarf

ESA telur að Ísland hafi ekki sýnt fram á að formlegt fyrirkomulag sé til staðar milli rannsóknaryfirvalda og annarra yfirvalda sem taka þátt í öryggisrannsóknum, svo sem dómsmálayfirvalda, flugfélaga og björgunarsveita. Þá hefur Ísland ekki tilkynnt um slíkt fyrirkomulag til ESA líkt og reglur gera ráð fyrir.

ESA leggur áherslu á mikilvægi þess að formfesta fyrirkomulag á samstarfi milli opinberra aðila þar sem þeim er ætlað að tryggja að hlutverk séu skýr og samstarf sé skilvirkt í tengslum við flugslys eða flugatvik, eins og fram kemur í tilkynningu ESA.