Mál manns sem braut gegn 16 stúlkum tekið fyrir

Aðalmeðferð í máli Harðar Éljagríms Sigurjónssonar, sem var dæmdur í þriggja ára fangelsi í Héraðsdómi Reykjavíkur fyrir brot gegn sextán stúlkum, hófst í Landsrétti í morgun.

Herði var fylgt inn í dómsalinn, en þinghaldið er lokað og fjölmiðlum því meinaður aðgangur. 

Frétt af mbl.is

Bíður dóms grunaður um brot gegn 16 stúlkum

Stúlkurnar voru 11 til 15 ára þegar brotin áttu sér stað. Hörður, sem er fyrrverandi rannsóknarlögreglumaður á sjötugsaldri, hafði samband við þær í gegnum einkaskilaboð á samfélagsmiðlinum Snapchat. Hann viðhafði við þær kynferðislegt tal og sendi sumum þeirra kynferðislegar myndir. Í tvö skipti reyndi hann að mæla sér mót við þær.

Hörður, lengst til vinstri, í Landsrétti í morgun. mbl.is/Kristinn Magnússon

„Ákærði sendi brotaþolum skilaboð án þess að skeyta um það hver væri móttakandi þeirra eða um afleiðingar háttseminnar. Voru brot ákærða gróf. Ákærði á sér engar málsbætur, en hann hélt áfram brotum sínum þrátt fyrir að hafa í maí 2021 verið handtekinn og yfirheyrður vegna hluta brotanna. Þá hélt hann í mörgum tilvikum áfram að senda brotaþolum gróf kynferðisleg skilaboð eftir að þær sögðu honum aldur sinn. Er það mat dómsins að ásetningur ákærða til brotanna hefði verið mjög sterkur,” segir í dómi héraðsdóms frá því í júlí í fyrra.

Hörður, sem neitaði sök í málinu, var einnig dæmdur til að greiða brotaþolunum miskabætur. Sömuleiðis var hann dæmdur fyrir vörslu barnakláms og fyrir umferðarlagabrot. 

Aðalmeðferðinni í Landsrétti lýkur á morgun.

• Blogga um frétt