Innlent | mbl | 16.5.2023 | 9:53

Andlát: Garðar Cortes

Garðar Cortes söngvari lést á sunnudaginn. Hann kom víða við á ferli sínum, stofnaði söngskóla, Íslensku óperuna, söng inn á fjölda hljómplatna og stjórnaði kórum og hljómsveitum. mbl.is/Kristinn Ingvarsson

Garðar Emanúel Axelsson Cortes óperusöngvari lést á sunnudaginn, 14. maí, á 83. aldursári. Garðar var fæddur í Reykjavík 24. september 1940. Hann hóf söngnám í London árið 1963 og nam þar einnig hljómsveitar- og kórstjórn. Lauk hann prófi frá The Royal Academy of Music árið 1968 og frá Watford School of Music árið eftir.

Eftir heimkomu til Íslands hóf hann tónlistarkennslu við Tónlistarskólann á Seyðisfirði þar sem hann gegndi einnig skólastjórastöðu. Samhliða kennslunni starfaði hann við Þjóðleikhúsið. Garðar flutti til Reykjavíkur í kjölfarið og stjórnaði ýmsum kórum, meðal annars Fóstbræðrum, auk þess sem hann söng með Einsöngvarakórnum, Ljóðakórnum og fleiri kórum.

Stofnaði Íslensku óperuna

Garðar hafði lengi dreymt um að stofna söngskóla og rættist sá draumur árið 1973 með Söngskólanum í Reykjavík þar sem hann varð skólastjóri frá upphafi og var aðsókn góð þegar frá fyrsta starfsári. Nutu ýmsir þekktir söngvarar leiðsagnar Garðars við skólann, svo sem Jóhann Friðgeir Valdimarsson, Kolbeinn Ketilsson, Bjarni Thor Kristinsson og sonur Garðars og nafni, Garðar Thór Cortes.

Á upphafsárum skólans stofnaði Garðar einnig Íslensku óperuna árið 1979 þar sem hann var svo óperustjóri um tveggja áratuga skeið. Eins kom hann Sinfóníuhljómsveit Reykjavíkur á fót um miðjan áttunda áratuginn og stofnaði um svipað leyti Kór Söngskólans sem skipaður var nemendum skólans. Var söngur kórsins gefinn út á nokkrum fjölda hljómplatna en hann varð síðar að Óperukórnum í Reykjavík.

Sæmdur fálkaorðunni árið 1990

Á ferli sínum varð Garðar þekktur í óperuhúsum víða um lönd, svo sem í Bandaríkjunum, Bretlandi og Skandinavíu og stjórnaði um stund Óperunni í Gautaborg í Svíþjóð. Hljómplötur með rödd hans eru þá fjöldamargar og má nefna Draum um hvít jól sem tekin var upp árið 2000, þar á meðal á þjóðhátíðardaginn 17. júní, en Suðurlandsskjálftinn þann dag truflaði þá upptökur.

Garðar var sæmdur Hinni íslensku fálkaorðu árið 1990 fyrir störf sín við tónlistina og hlaut Bjartsýnisverðlaun Brösters fyrir stofnun Íslensku óperunnar á sínum tíma. Þá var hann sæmdur heiðursverðlaunum Grímunnar árið 2017 og hlaut fjölda annarra verðlauna og viðurkenninga.

Garðar Cortes lætur eftir sig fjögur börn og níu barnabörn. Eftirlifandi eiginkona hans er Krystyna Maria Blasiak Cortes.