Almennt virðist hafa farið vel um þjóðarleiðtogana það sem af er degi, að undanskilinni lyftuferð Emmanuel Macron Frakklandsforseta og Katrínar Jakobsdóttur forsætisráðherra. 

Skipulagt var að Macron og Katrín myndu víkja fimmtán mínútum fyrr úr fundarsalnum, svo þau gætu rætt málin sín á milli á leið sinni upp í kvöldverðarsalinn. Hin sporlétta Katrín virtist ætla sér að taka stigann, en franski samferðarmaður hennar hafði augastað á lyftunni og úr varð að þau komu sér fyrir inn í lyftunni. 

Þegar fyrirmennin voru komin inn í lyftuna upphófst spaugileg atburðarás. Forseti Frakklands á sér ófáa fylgifiska, sem virtust allir áfjáðir í að eyða stund með Macron og Katrínu í lyftunni, enda aðdráttarafl valdsins velþekkt og allt er þetta ómissandi fólk.

Fylgdarliðið þyrptist inn í lyftuna af svo mikilli ákefð að forsetinn og forsætisráðherrann virtust eiga á hættu á að troðast undir, en lífverðir kipptu sér ekki upp við það. 

Myndirnar sýna hvernig Katrín og Macron hurfu smám á bak við mannhafið. 

Hið þaulskipulagða tveggja manna tal hefur eflaust þurft að bíða þar til þau komust upp á efstu hæð og út úr viðjum lyftunnar.