Edi Rama, forsætisráðherra Albaníu, flutti mjög afgerandi ávarp á leiðtogafundi Evrópuráðsins, þar sem hann skoraði á ráðið að draga til baka skýrslu frá 2010 þar sem Albanía og Frelsisher Kosovo væri að undirlagi Rússa ranglega gefið að sök að hafa brotið mannréttindi og stundað sölu á líffærum manna.

Sagði Rama að þessar ásakanir væru runnar undan rifjum Rússa og minntu á málflutning þeirra um óstjórn og nasisma í Úkraínu. Hann sæi þó ekki fyrir sér að Volodimír Selenskí yrði síðar veginn og metinn í Evrópuráðinu á grundvelli þessara fullyrðinga Rússa.

Á sínum tíma hefðu margir í Evrópuráðinu greitt atkvæði með lokuð augun, en nú væri margt breytt og Rússar ekki lengur í Evrópuráðinu. Albanar hefðu aldrei verið í vafa um hið rétta eðli Moskvu og stuðningur Albana við Rússland rokkaði á milli 0,7 og 1,2%.

Rama baðst afsökunar á að setja þennan tón í samkvæminu og brjóta píanóið, sem Víkingur Heiðar Ólafsson lék á Ave Maria fyrr á fundinum. Hann sagði að Albanía væri lítið land, en allt, sem Albanar gerðu fyrir Úkraínu, væri gert með þakklæti. „Selenskí ætti ekki að þakka okkur, heldur ættum við að þakka Úkraínu fyrir allt sem hún er að gera fyrir okkur og Evrópu,“ sagði Edi Ramia.

Tengdar fréttir

Leiðtogafundur Evrópuráðsins í Hörpu

Fundurinn notaður sem afsökun fyrir vopnavæðingu

• Keypti glock-skammbyssur fyrir 30 milljónir
• Keypti 175 skothelda hjálma á 34 milljónir
• Keypti smellubindi fyrir rúmar 300 þúsund krónur
• Leiðtogafundurinn kostaði skildinginn

» Fleiri tengdar fréttir

• Blogga um frétt