109 nemendur útskrifuðust úr FÁ

Útskriftarathöfn Fjölbrautaskólans við Ármúla var haldin í dag. 109 nemendur útskrifuðust úr skólanum og dúx skólans var með ágætiseinkunn upp á 9,2.

46 nemendur útskrifuðust af heilbrigðisbraut, tuttugu af sjúkraliðabraut, þrettán af heilsunuddbraut, níu af tanntæknabraut, tveir af lyfjatæknibraut og tveir af heilbrigðisritarabraut.

Tveir stúdentar útskrifuðust einnig af nýsköpunar- og listabraut.

Tólf útskrifuðust af félagsfræðibraut, fjórir af íþrótta- og heilbrigðisbraut, fimm af náttúrufræðibraut og 24 af opinni braut. Fjórir útskrifuðust af viðskipta- og hagfræðibraut, þar á meðal dúx skólans Óli Þorbjörn Guðbjartsson.

Nýútskrifaðir stúdentar úr Fjölbrautaskólanum við Ármúla Ljósmynd/Aðsend

Flóttamannavandi vegna uppskerubrests

Í ræðu sinni ræddi Magnús Ingvason skólameistari um „sívaxandi flóttamannavanda sem má rekja til uppskerubrests vegna loftslagsbreytinga og hlýnunar jarðar og sölu drápstækja til ýmissa skúrka víða um heim, mest í boði hinna velmegandi vestrænna ríkja sem annars vegar standa fyrir mestri mengun og hins vegar á hagvaxtardrifinni vopnasölu“.

Í lok ræðu sinnar sló hann á léttari strengi og hvatti útskriftarnemendur til þess að gleyma ekki markmiði lífsins, sem væri að vera ætíð hamingjusöm.

Kristrún Birgisdóttir aðstoðarskólameistari ávarpaði einnig stúdenta á athöfninni þar sem hún sagði:

„Einhver ykkar upplifa ef til vill tilfinningu um frelsi á þessum tímamótum en spurningin er hvort það eru ekki frekar þið, aðstandendur, sem eruð að fá frelsið núna þegar þau sem hér eru að útskrifast hafa náð þessum áfanga.“

• Blogga um frétt