Börn ráðleggja stjórnvöldum

Yfir fjörutíu börn af Norðurlandi tóku þátt í ráðstefnu mennta- og barnamálaráðherra um barnvænt Ísland og innleiðingu Barnasáttmála Sameinuðu þjóðanna hérlendis. Tilgangur ráðstefnunnar var að ræða athugasemdir barnaréttarnefndar Sameinuðu þjóðanna um innleiðinguna og veita börnum rödd í ákvarðanatökum er varða hag þeirra.

Ráðstefnan fór fram í Rósenborg á Akureyri og komu þar 41 fulltrúi barna á aldrinum 13-15 ára úr grunnskólum Norðurlands. Var börnunum falið að koma með sínar tillögur varðandi hvernig íslenska ríkið skyldi bregðast við lokaathugasemdum barnaréttarnefndarinnar í þeim tilgangi að gera Ísland að enn betri stað fyrir öll börn.

Börnin fjölmenntu í Rósenborg á Akureyri. Ljósmynd/Stjórnarráðið

Athugasemdum var skipt í flokka undir mismunandi yfirskriftum sem voru:

• Þátttaka barna
• Vernd gegn ofbeldi og barnvænt dómkerfi
• Fjölskyldan og fósturkerfið
• Börn í viðkvæmri stöðu
• Menntun og tómstundir
• Heilsa og umhverfið

Tillögur barnanna verða síðan teknar til greina við úrvinnslu athugasemdanna innan Stjórnarráðsins.

Barnaréttarnefnd Sameinuðu þjóðanna er staðsett í Genf og fer með eftirlitshlutverk um framkvæmd Barnasáttmálans í aðildarríkjunum. Hvert aðildarríki fær athugasemdir, eftir úttekt nefndarinnar á réttindum barna, á fimm ára fresti. Íslensk stjórnvöld fullgiltu Barnasáttmálann árið 1992 og lögfestu hann árið 2013.

• Blogga um frétt