Fáséð djúp lægð fyrir þennan árstíma

Einar Sveinbjörnsson veðurfræðingur segir í Facebook-færslu veðurvefsins Bliku að djúp lægð nálgist nú landið, en gular viðvaranir hafa verið gefnar út fyrir morgundaginn. 

Frétt af mbl.is

Gular viðvaranir víða um land

„Kalt loft vestan frá Hudsonflóa í Kanada berst í veg fyrir hlýrra og rakara sem ættað er af Atlantshafinu,“ segir Einar og bendir á að stefnumótið verður syðst á Grænlandi. 

Úr verði nokkuð dæmigerð lægð, en hins vegar ódæmigerð fyrir árstímann, „því þegar líður á vorið dregur mjög úr líkum á stefnumóti sem þessu í hlutfalli við minni fyrirferð kalda loftsins“.

Einar segir að hvassast verði einkum um vestan- og norðvestanvert landið í eftirmiðdaginn.

„Þætti vart frásagnarvert að hausti eða á veturna, en síðari hluta maí eru slíkar lægðir fremur fáséðar,“ segir hann og bætir við að lægðin slái þó ekki út dýpri lægð sem fór austur með suðurströndinni 15. maí árið 2015.

• Blogga um frétt