Sjóðurinn tæmdist á miðju ári

Bókaforlög fengu rúmar 417 milljónir króna í endurgreiðslur frá íslenska ríkinu á síðasta ári. Greiðslurnar eru inntar af hendi í samræmi við lög sem sett voru til að styðja tímabundið við íslenska bókaútgáfu.

Fyrsta heila starfsár nýs sjóðs sem settur var á fót vegna þessa var árið 2020 og það ár voru greiddar út 398 milljónir króna. Árið 2021 voru greiddar út 374 milljónir. Árið 2022 er því metár í umræddum endurgreiðslum enda kom á daginn að ekki var nóg til af peningum til að sinna öllum umsóknum.