Ríflega helmingi færri sækja um í tannlæknisfræði

Aðeins 41 sækist eftir því að komast að í tannlæknisfræði við Háskóla Íslands í haust en umsækjendur þreyta nú í fyrsta sinn inntökupróf. Allt að 40 nemendum verður boðið að hefja nám í haust en í desember verða haldin samkeppnispróf og komast átta nemendur þá áfram.

Þetta kemur fram í tilkynningu frá Háskóla Íslands. 

Í viðtali við Morgunblaðið í mars sagði Ellen Flosadóttir, deildarstjóri tannlæknadeildar, ríflega hundrað manns hafa sótt um í tannlæknisfræði á síðasta ári. Liggur því fyrir að umtalsvert færri reyna að komast að nú þegar inntökuprófið bætist við.

Frétt af mbl.is

Inntökupróf bætist við nemendasíu

Umsækjendum fækkar

Þá hafa alls 238 skráð sig í inntökupróf í læknisfræði og 64 í sjúkraþjálfunarfræði. Prófið er haldið dagana 8. og 9. júní á háskólasvæðinu og verða 60 nemendur teknir inn í læknisfræði en 35 í sjúkraþjálfunarfræði.

Fjöldi þeirra sem sækja um í læknis- og sjúkraþjálfunarfræði lækkar einnig milli ára en í tilkynningu frá HÍ frá því í fyrra kemur fram að 295 hafi verið skráðir í inntökupróf í læknisfræði og 68 í sjúkraþjálfunarfræði.

Frétt af mbl.is

Yfir 360 þreyta inntökupróf í HÍ

Sama prófið

Þeir sem sækja um í tannlæknisfræði þreyta sama inntökupróf og þeir sem sækja um í læknis- og sjúkraþjálfunarfræði.

Í tilkynningunni segir að inntökuprófið fari fram í nokkrum byggingum háskólans og að allir þreyti prófið í prófakerfinu Inspera. Geta þeir ýmist nýtt eigin tölvur eða tölvur sem HÍ lánar til próftöku. 

Þetta er í annað sinn sem slíkt fyrirkomulag er viðhaft. Inntökuprófið tekur tvo daga líkt og áður og í því eru sex tveggja tíma próflotur. 

• Blogga um frétt