Braut kynferðislega gegn stjúpdóttur sinni

Karlmaður hefur verið dæmdur í eins og hálfs árs fangelsi fyrir kynferðisbrot gegn níu ára stjúpdóttur sinni.

Brotið átti sér stað á heimili þeirra í nóvember árið 2020.

Manninum var gefið að sök kynferðisbrot gegn barni og stórfellt brot í nánu sambandi með því að hafa misnotað freklega yfirburðastöðu sína gagnvart barninu, traust hennar og trúnað í hans garð sem stjúpföður hennar og á alvarlegan hátt ógnað heilsu og velferð hennar og haft við hana önnur kynferðismök en samræði með því að stinga fingri inn í leggöng og endaþarm hennar.

Bar við minnisleysi vegna áfengisneyslu

Í dómi Héraðsdóms Reykjaness kemur fram að stúlkan hafi sagt ömmu sinni frá atvikinu er hún kom í heimsókn tveimur dögum síðar. Stúlkan hafi síðan brotnað niður og farið að gráta.

Maðurinn hvorki neitaði né játaði sök og bar við minnisleysi vegna áfengisneyslu. Hann lýsti því hins vegar fyrir dómi að hann teldi ólíklegt að stúlkan hefði verið að ljúga.

Héraðsdómur taldi sannað að maðurinn hefði brotið gegn stúlkunni og var hann dæmdur í 18 mánaða fangelsi. Þá var honum gert að greiða stúlkunni 1,2 milljónir króna í miskabætur.

• Blogga um frétt