Búist við mikilli aðsókn á tjaldsvæði landsins í sumar

Aðsókn hefur verið nokkuð góð miðað við árstíma en ferðalög Íslendinga innanlands eru að mestu leyti háð veðri, að sögn Ásgeirs Hreiðarssonar, framkvæmdastjóra hjá Hömrum á Akureyri. Ferðamönnum á svæðinu hefur fjölgað mikið frá seinasta sumri og reiknar Ásgeir með 20-30% fjölgun í ár.

Ásmundur Smári Ragnarsson, tjaldvörður í Vaglaskógi, býst við því að mikið verði að gera á meðan spáin sé góð. Að hans sögn helst þetta alltaf í hendur við veðrið en þó séu ávallt nokkrir sem hafa ákveðið að koma, sama hvernig viðrar.

Á Austurlandi virðist útlit fyrir þéttsetin tjaldsvæði og Heiður Vigfúsdóttir, sem rekur tjaldsvæðið á Egilsstöðum, ráðleggur öllum að bóka fljótlega því að haldist veðurspáin eins verði tjaldsvæðið nokkuð eftirsótt. Eru horfurnar eins annars staðar á Austurlandi en bæði tjaldsvæðið við Sandfellsskóg og Djúpavog eru næstum því fullbókuð út sumarið.

Straumur í Grundarfjörð

Blíðan hefur enn ekki látið sjá sig á Vesturlandi en það virðist þó ekki hafa áhrif á áform fólks sem streymir t.d. í Grundarfjörð. Kristín Haraldsdóttir, sem sér um tjaldsvæðið, segir að nóg sé að gera. Straumurinn nú í maí og byrjun júní jafnist á við júlíbyrjun. Segir hún erlenda ferðamenn ekki láta veðrið hafa áhrif á fyrirætlanir sínar.