Aftanákeyrsla í kjölfar áreksturs

Tveir árekstrar urðu á Suðurlandsvegi síðastliðinn laugardag, en sá seinni var aftanákeyrsla sem varð eftir að loka þurfti fyrir umferð á veginum sökum fyrri árekstursins. 

Frétt af mbl.is

Umfangsmikill árekstur á Suðurlandsvegi

Símon Geir Geirsson, varðstjóri hjá lögreglunni á Suðurlandi, segir að ökumenn þurfi að sýna meiri aðgætni á veginum og tryggja að nægileg fjarlægð sé á milli bifreiða í umferðinni. 

„Alltof stutt bil á milli bíla“

„Þetta kemur öðru hverju fyrir þarna á Suðurlandsveginum, en þessar aftanákeyrslur eru fyrst og fremst að gerast því það er alltof stutt bil á milli bíla,“ segir Símon Geir. 

Fimm voru fluttir til aðhlynningar á Heilbrigðisstofnun Suðurlands og einn var með teljandi meiðsli. Sá lenti í seinni árekstrinum og hlaut rifbeinsbrot vegna bílbeltis. 

Símon segir að umferðin sé mjög þétt á Suðurlandsveginum yfir sumartímann og það auki hættuna á árekstrum. „Það er alltaf mikil umferð á þessum tíma árs og þá sérstaklega um helgar, en þá verður bara að hafa varann á.“

• Blogga um frétt