Fylgjast með ferðum hvalveiðaandstæðingsins
Setja bókamerki
Landhelgisgæslan fylgist með ferðum skips Paul Watson, John Paul DeJoria, sem væntanlegt er hingað til landsins. Henni er kunnugt um þær yfirlýsingar sem áhöfn skipsins hefur gefið í fjölmiðlum og á samfélagsmiðlum. Þetta kemur fram í skriflegu svari Landhelgisgæslunnar við fyrirspurn mbl.is.
Paul Watson, stofnandi umhverfisverndarsamtakanna Sea Shepherd, hefur boðað komu sína og áhafnar sinnar á skipinu John Paul DeJoria á Íslandsmið á morgun. Er ætlun Watsons sú að koma í veg fyrir hvalveiðar og fer hann fram á í bréfi til Alþingis að leyfi Hvals hf. verði afturkallað.
Fylgjast með ferðum skipsins í stjórnstöðinni
„Landhelgisgæslunni er kunnugt um yfirlýsingar Paul Watson og fylgist með ferðum skipsins í stjórnstöðinni,“ segir í skriflegu svari Ásgeirs Erlendssonar upplýsingafulltrúa Landhelgisgæslunnar við fyrirspurn mbl.is.
„Skipið er ekki komið inn í íslenska efnahagslögsögu en fylgst er með ferðum þess líkt og öðrum skipum sem væntanleg eru til landsins. Áfram verður síðan fylgst með skipinu eftir að það kemur inn í lögsöguna.“
Ekki heimild til að vísa skipum úr landhelginni
Hefur landhelgisgæslan heimild til þess að vísa skipinu á brott?
„Innan íslenskrar efnahagslögsögu er skipið á alþjóðlegu hafsvæði og hefur rétt til þess að sigla þar um, að því gefnu að það fylgi þeim lögum og reglum sem þar gilda,“ segir í svari Ásgeirs. Þá segir hann Landhelgisgæsluna ekki hafa heimild til þess að vísa skipum úr landhelginni. Hún geti þó fært skip til hafnar ef grunur leikur á lögbroti.
Grípa inn í eftir aðstæðum
Hver eru viðbrögð Landhelgisgæslunnar við komu John Paul DeJoria á Íslandsmið? Verður gefin út handtökuskipun?
„Ef landhelgisgæslan verður vör við lögbrot á hafsvæðinu umhverfis Ísland er það hlutverk hennar að grípa inn í eftir aðstæðum,“ segir í skriflegu svari Ásgeirs. Hann lætur ekkert uppi um það hvort líkur séu á því að handtökuskipun á hendur Watson verði gefin út á næstu dögum.
„Landhelgisgæslan er meðvituð um alþjóðlega handtökuskipun gegn Watson sem strandgæsla Japan fékk gefna út árið 2010.“ Þetta kemur einnig fram í svari Ásgeirs.
Ekki fékkst svar við fyrirspurn mbl.is um hlutverk Landhelgisgæslunnar þegar kemur að alþjóðlegu handtökuskipuninni gegn Watson.
Segir lögreglu hafa hætt við þegar lögmaður mætti
Björgunarsveitir kallaðar út fyrir norðan
Bókun 35 enn stjórnarskrárbrot
Vélarbilun hjá Play setur áramótin í uppnám
Úkraínumenn handtóku norðurkóreskan hermann
Skiptar skoðanir um frestun landsfundar
„Þetta mun allt enda með ósköpum“
Biðst afsökunar á „hræðilegu atviki“
