Veltan aukist um 89% síðustu ár

Lög um tímabundinn stuðning við útgáfu bóka á íslensku eru nú til endurskoðunar en umrætt úrræði á að óbreyttu að renna út um áramót. Það felur í sér að útgefendur fá hluta kostnaðar við útgáfuna endurgreiddan. Á málþingi sem menningar- og viðskiptaráðuneytið hélt um bókmenntir og útgáfu á dögunum kom hins vegar fram skýr yfirlýsing frá Lilju Alfreðsdóttur um að stuðningurinn verði framlengdur. Sagði Lilja að gert væri ráð fyrir endurgreiðslunni í fjármálaáætlun næstu ára. Ekki náðist í Lilju við vinnslu fréttarinnar í gær.

Rætt um stöðu Storytel

Heiðar Ingi segir í samtali við Morgunblaðið að nú standi yfir í ráðuneyti menningarmála vinna við mat á áhrifum endurgreiðslunnar. Það mat hafi reyndar átt að liggja fyrir um síðustu áramót. Deloitte mun skila úttekt þar sem meðal annars verður rýnt í fjölbreytni í útgáfu á milli flokka.

Samkvæmt upplýsingum Morgunblaðsins hefur verið til umræðu hvort raunhæft sé að breyta endurgreiðslukerfinu svo fjármunir nýtist betur. Í bókabransanum hefur til að mynda verið rætt hvort rétt sé að Storytel geti sótt sér háar upphæðir í endurgreiðslu en fyrirtækið hefur verið í umræðunni undanfarið sökum gagnrýni á það hversu rýran hlut rétthafar bera frá borði í útgáfu þess. Engar útfærslur eða lausnir hafa þó verið nefndar enda kynnu takmarkanir á því hverjir eiga rétt á endurgreiðslu að bitna á útgefendum, sem síst skyldi.

Heiðar Ingi segir að stóra málið sé að skoða árangur sem náðst hafi eftir að endurgreiðslunni var komið á í ársbyrjun 2019. Velta bókaútgáfu dróst saman um 41% frá 2008 til 2017 en viðsnúningur hefur orðið á eftir að endurgreiðslan kom til. „Veltan hefur aukist á þessum fjórum árum um 2,1 milljarð, fór úr 2,4 milljörðum í 4,6 milljarða í fyrra. Í prósentum talið er þetta 89% aukning sem er langt umfram þær væntingar sem lagt var upp með í byrjun.“

Nánari umfjöllun er að finna í Morgunblaðinu í dag