Blikastaðir verða miðja hverfisins

Blikastaðaland er kennt við bæinn Blikastaði. Það er um 98 hektara land sem liggur á mörkum Staðahverfis í Grafarvogi í Reykjavík og Höfðahverfisins í Mosfellsbæ. Skipulagssvæðið (sjá kort) er eitt stærsta óbyggða svæðið á höfuðborgarsvæðinu, ef ekki það stærsta.

Gert er ráð fyrir 3.500 til 3.700 íbúðum í Blikastaðalandi. Miðað við að 2,4 búi að jafnaði í íbúð gætu því 8.400 til 8.900 manns búið í hverfinu.

Blikastaðaland. Kort/mbl.is

Ef aðalskipulag verður tilbúið á næsta ári tekur við vinna við deiliskipulag svæðisins, sem verður byggt í áföngum. Ef deiliskipulag verður tilbúið um áramótin 2024/2025 gætu framkvæmdir hugsanlega hafist 2025. Gerðar hafa verið ítarlegar rannsóknir á svæðinu, þ.m.t. af hálfu ÍSOR og ráðgjafafyrirtækisins COWI.

Blönduð byggð við veginn

Jafnframt eru hugmyndir um 60 þúsund fermetra blandaða byggð meðfram Vesturlandsvegi. Þar er áformað að byggja atvinnuhúsnæði og íbúðir sem snúa að Blikastaðalandi. Fjöldi fermetra í þessari blönduðu byggð, sem og samanlagður fermetrafjöldi á svæðinu, liggur ekki endanlega fyrir.

Hér má sjá fyrir sér hvernig aðkoman gæti orðið. Teikning/Batteríið arkitektar

Tillaga að rammahluta aðalskipulags var kynnt á íbúafundi 15. júní síðastliðinn. Svæðið verður síðan þróað frekar og verður deiliskipulag kynnt síðar. Til stendur að byggja hverfið í áföngum. Jafnframt verður hvert hverfi sjálfstætt hvað varðar gatnakerfi, græna geira og byggð.

Nánar er fjallað um uppbyggingaráform í Blikastaðalandi í Morgunblaðinu í dag.