Litu blint á lagabókstafinn og vantaði heildarmyndina

Yfirskattanefnd komst að þeirri niðurstöðu að félagasamtökin Afrekshugur skyldu greiða virðisaukaskatt vegna innflutnings á afsteypu af verkinu Afrekshugur eftir Nínu Sæmundsson. Formaður félagsins, Friðrik Erlingsson, segir að yfirskattanefnd hafi ekki litið á heildarmyndina og horft til þess að um hafi verið að ræða einstakt verkefni sem samfélagið í sameiningu hafi staðið að. Litið hafi verið blint á lagabókstafinn, enda ljóst að félagið hafi eingöngu verið stofnað í þeim tilgangi að færa Rangárþingi eystra þessa menningargjöf.

Frétt af mbl.is

Teikningar sýna nýjan miðbæ á Hvolsvelli

Upprunalega listaverkið stóð framan við Waldorf Astoria-hótelið í New York, en félagið fékk þrívíddarskönnun af styttunni svo hægt væri að gera afsteypu af verkinu. Í kjölfarið hófst söfnun svo hægt væri að fjármagna afsteypuna. „Við í stjórn þessa félags leituðum eftir tilboðum í afsteypugerðina og hófum svo almenna söfnun til þess að þetta gæti gerst. Þetta er fyrst og fremst menningarsögulegt verkefni og Nína einn frægasti listamaður héraðsins,“ segir Friðrik. „Það var í þessum anda sem verkefnið fór af stað, til þess að heiðra hennar minningu og færa þessa frægustu styttu hennar, sem er eitt af einkennistáknum New York-borgar, heim í hérað henni til sóma og minningar,“ segir Friðrik.