Ráðherrar tókust á um veðurspána

Rigning dundi á forsætisráðherrum Norðurlandanna og Kanada á árlegum sumarfundi sem haldinn var í Vestmannaeyjum í dag. Við minningarathöfn á Flakkaranum, fyrir ofan Skansinn, göntuðust ráðherrarnir sín á milli um hvaða veðurspá hefði reynst rétt. 

Veðurstofa Íslands hafði spáð lítilli sem engri úrkomu fyrir hádegi á mánudag. Það var þó hverju mannsbarni í Eyjum ljóst í morgun að sú spá hefði ekki gengið eftir. 

Páll Magnússon galdraði sólina fram þegar þau Íris Róbertsdóttir, bæjastjóri Vestmannaeyja, höfðu lokið við ræðuhöld. AFP/Halldór Kolbeins

Að því er heyra mátti ráðherrana gantast með hafði norska veðurspáin á YR.no sem Íslendingar líta svo oft til, verið rétt. 

Eins og svo oft er með veðurfarið á Íslandi skiptist á skin og skúrir þessar fimmtán mínútur sem ráðherrarnir voru undir beru lofti. Við lok athafnarinnar á Flakkaranum skein sól og líkt og spenntir ferðamenn rifu margir ráðherranna fram símana og mynduðu kletta Vestmannaeyja í bak og fyrir. 

Norski forsætisráðherrann, Jonas Gahr Store, vel klæddur í broddi fylkingar, á eftir fylgir Ulf Kristersson, forsætisráðherra Svíþjóðar, enn betur útbúinn með hettu. AFP/Halldór Kolbeins

• Blogga um frétt