Fjórir inni í húsinu þegar eldurinn kviknaði

Fjórir fullorðnir einstaklingar voru inni í einbýlishúsinu við Blesugróf þegar að eldur kviknaði í húsinu í gær. Allir komust út af sjálfsdáðum og sakaði engan.

Þetta staðfestir Ásmundur Rúnar Gylfason, aðstoðaryfirlögregluþjónn hjá lögreglunni á höfuðborgarsvæðinu.

Allt tiltækt slökkvilið var kallað út í gær en húsið varð alelda skömmu eftir að sprenging heyrðist. Um er að ræða lágreist tveggja hæða timburhús.

Að sögn Ásmundar eru eldsupptök enn óljós en lögregla rannsakar vettvang í dag með aðstoð tæknideildar.

Gat hann ekki gefið nánari skýringar á sprengingunni sem heyrðist en hann kveðst vona að rannsóknin í dag geti gefið lögreglu skýrari mynd af því sem gerðist í gær.

Frétt af mbl.is

Byrjað að rífa húsið

• Blogga um frétt