Lögreglu barst tilkynning um 200 til 300 manna ungmennapartí í Guðmundarlundi í Kópavogi í gærkvöldi. Þegar lögreglu bar að garði var rólegt yfir öllu og tónlist ómaði undir sykurpúðagrilli.
Engin sjáanleg ölvun var á ungmennum, en einhverjir voru þó að fá sér sopa inni í skóginum, að því er segir í dagbók lögreglu. Ungmennin höfðu sjálf orð á því að þetta væri „heldur vandræðalegt partí“.
Tilkynnt var um líkamsárás í Hamraborg í Kópavogi og var þolandi fluttur á slysadeild til aðhlynningar, en gerendur höfðu flúið af vettvangi.
Fimm ökumenn voru kærðir fyrir akstur undir áfrifum áfengis og/eða annarra vímuefna á höfuðborgarsvæðinu.
Tilkynnt var um menn með piparúða í miðbæ Reykjavíkur. Mönnunum var sleppt eftir viðræður á lögreglustöð.
Þá var tilkynnt um aðila reyna að tæla konur upp í bifreið sína. Atvikið er bókað á lögreglustöð 1 sem sinnir verkefnum á Seltjarnarnesi, í Vesturbæ, miðbæ og austurbæ.
Rúmlega 100 mál voru skráð hjá lögreglunni á höfuðborgarsvæðinu í gærkvöldi og í nótt.