Kröftugur skjálfti á Reykjanesskaganum

Snarpur skjálfti fannst klukkan 17.57 á suðvesturhorni landsins.

Samkvæmt tilkynningu frá Veðurstofu Íslands var skjálftinn 4,5 að stærð og átti upptök sín rétt vestan við Kleifarvatn. Sam­kvæmt bráðabirgðatöl­um Veður­stof­u Íslands mældist hann á 1,1 kílómetra dýpi.

„Tilkynningar hafa borist víðsvegar frá suðvesturhorninu um að hann hafi fundist. Skjálftinn er talinn vera svokallaður gikkskjálfti, sem verður vegna spennubreytinga á svæðinu,“ segir í tilkynningunni.

Fólk hefur lýst því yfir í samtali við mbl.is að skjálftinn hafi fundist á Hvolsvelli og Hellu.

Veðurstofan biðlar jafnframt til fólks að hafa varann á þar sem að grjóthrun getur orðið í kjölfar skjálfta sem þessa. „Íbúar í grennd við svæðið eru hvattir til að huga að lausa- og innanstokksmunum.“

Íbúi á Völlunum í Hafnarfirði varð var við grjóthrun er jarðskjálftinn reið yfir. Séð í áttina að Krýsuvík. mbl.is/Aðsend

• Blogga um frétt