Nafn ökumannsins sem lést

Ökumaður vélhjólsins sem lést á föstudaginn í slysinu við Laugarvatnsveg hét Jón Blær Jónsson Knudsen. Slysið varð upp úr klukkan 18.00 á föstudaginn en tildrög slyssins eru enn til rannsóknar hjá lögreglu.

Eiginkona Jóns, Gulla Ólafsdóttir, minntist eiginmanns síns í færslu á facebooksíðu sinni í gær. Hún gaf mbl.is góðfúslegt leyfi til að endurbirta færsluna og vísa í hana.

„Í gær áttum við hjónin góða stund í góðu veðri í góðra vina hópi sem endaði með eins hryllilegum hætti og hugsast getur þegar Jónbi lést í hörmulegu bifhjólaslysi við Laugarvatn,“ segir í færslunni.

Hún segir eiginmann sinn hafa verið hrók alls fagnaðar og að hans sé sárt saknað.

„Við fjölskyldan sitjum hér saman í sárum og skiljum ekki hversu ósanngjarnt lífið getur verið.“

• Blogga um frétt