„Þetta er búið að vera í undirbúningi í langan tíma. Fréttir af þróun lyfsins bárust fyrst árið 2016. Síðan þá hafa nokkur svipuð lyf verið í þróun. Í fyrra kom lyf sem er nokkuð svipað umræddu lyfi en tilkoma þess gaf aukna von um að nýja lyfið gæti staðið undir vonum,“ segir Guðlaugur Eyjólfsson, framkvæmdarstjóri Alzheimersamtakanna á Íslandi, í samtali við mbl.is.
Niðurstöður sem voru birtar í dag sýna fram á að lyfið donanemab hægir á hrörnun heila Alzheimer-sjúklinga um þriðjung. Lyfið er sambærilegt lyfinu lecanemab sem hefur verið lofað af vísindasamfélaginu.
Guðlaugur fagnar niðurstöðunum og segir þau mikilvæg tímamót, en hann telur tafir og aðrar hindranir geta valdið fólki vonbrigðum.
„Svona ferli geta auðvitað tekið langan tíma, en fyrir utan það eru þetta gríðarlega dýr lyf, svo að við sjáum ekki fyrir okkur að það fari í almenna notkun á næstunni. Sjúklingarnir sjálfir þurfa að uppfylla ákveðin skilyrði til að geta fengið lyfið, svo að hópurinn sem gæti nýtt sér það væri ekki endilega stór svona til að byrja með,“ segir Guðlaugur.
„Það er samt sem áður mikil bjartsýni sem að fylgir þessu og við fylgjumst spennt með framhaldinu. Í svona ferli eru nokkur mikilvæg tímamót og þessi stund tilheyrir klárlega þeim hópi,“ bætir Guðlaugur við.