Innlent | mbl | 20.7.2023 | 14:28 | Uppfært 15:42

Láta ekki ná í sig vegna málsins

Sigurður Ingi Jóhannsson innviðaráðherra og Ásmundur Einar Daðason, barna- og menntamálaráðherra. Samsett mynd

Ásmundur Einar Daðason barna- og menntamálaráðherra og Sigurður Ingi Jóhannsson innviðaráðherra hafa ekki látið ná í sig til að veita viðtöl vegna ásakana Ásu Skúladóttur og systur hennar á hendur Ásmundi og föður hans, Daða Einarssyni.

Blaðamaður mbl.is hefur ítrekað reynt að hafa samband við Ásmund í dag og í gær, án árangurs. Sigurður hefur þá ekki svarað símtölum mbl.is til að svara því hvort málið hafi verið rætt innan Framsóknarflokksins.

Daði Einarsson segir í samtali við mbl.is að hann kjósi að tjá sig ekki um málið.

Lögreglan á Vesturlandi segir í svari við fyrirspurn mbl.is að henni sé ekki heimilt að svara erindinu efnislega hvað varðar rannsókn málsins.

Sakar ráðherra um tvö innbrot

Ása Skúladóttir, stjarneðlisfræðingur og ein þriggja systra sem standa fyrir hlaðvarpinu Lömbin þagna ekki, sakaði Ásmund um tvö innbrot í samtali við mbl.is í gær. Í hlaðvarpinu deila systurnar sögu sinni af hatrömmum ættardeilum sem hafa staðið síðan árið 2007.

Frétt af mbl.is

Sakar Ásmund um innbrot: „Lögreglan gerir ekkert“

Sakaði Ása bæði Ásmund og Daða um ýmis skemmdarverk og ógnir gegn föður sínum vegna landareignarinnar Lambeyra í Dölum. Skúli Einarsson, faðir Ásu, á jörðina núna ásamt tveimur systrum sínum og mági. Jörðin var upphaflega í eigu allra átta barna Einars Valdimars Ólafssonar sem lést 2007.

Öll börnin áttu þá 1/8 hluta hvert en Daði tók við búskap á jörðinni áður en hann sigldi rekstri jarðarinnar í þrot árið 2017 að sögn Ásu. Þá fór jörðin á uppboð þar sem Skúli keypti hana.

„Þegar lögreglan er komin er Ásmundur inni í húsinu. Það sem er svo ógnvænlegt við þetta er að hann var ekki einn. Á hlaðinu voru tveir til þrír stórir bílar og menn með honum. Ásmundur hélt því fram að hann væri í flutningum og lögreglan lét það vera að hafa afskipti af honum,“ sagði Ása í gær um ráðherrann.