Vill stytta ferðina milli Reykjavíkur og Akureyrar

Njáll Trausti Friðbertsson, þingmaður Sjálfstæðisflokksins, mun leggja fram þingsályktunartillögu þess efnis að fá svokallaða Húnavallaleið á samgönguáætlun fyrir árin 2024-2038, en þessi veglína er ekki á áætlun núna.

„Það er varla til skynsamlegri framkvæmd í vegamálum en Húnavallaleiðin,“ segir Njáll í samtali við mbl.is. Húnavallaleiðin myndi stytta ferðina á milli Reykjavíkur og Akureyrar um 14 kílómetra með nýjum 17 kílómetra löngum vegi.

Vegstæðið sem Vegagerðin lagði fram á sínum tíma undir heitinu Húnavallaleið liggur frá Brekkukoti yfir í Langadal þar sem vegurinn myndi tengjast núverandi þjóðvegi við Hvamm í Langadal.

Ein arðsamasta framkvæmdin að mati Njáls

Njáll Trausti segir þessa vegaframkvæmd vera eina þá arðsömustu sem hægt sé að ráðast í hér á landi.

„Þjóðhagslegi ábatinn af þessari framkvæmd er mikill. Sparnaður fyrir vegfarendur, fækkar slysum og óhöppum og auðvitað tímasparnaðurinn. Hér er rétt að hafa í huga að núverandi vegir myndu áfram liggja til og frá Blönduósi þannig að ef vegfarendur eiga þangað erindi þá hefur ný leið engin áhrif á það,“ segir Njáll og bætir við:

„Ef litið er til heildarhagsmuna samfélagsins þá er þetta einfaldlega mjög góð framkvæmd.“

Húnavallaleiðin myndi stytta ferðina á milli Reykjavíkur og Akureyrar um 14 kílómetra með nýjum 17 kílómetra löngum vegi. Tölvuteiknuð mynd.

Slysum og óhöppum gæti fækkað

Að sögn Njáls þá kemur fram í greinargerð Vegagerðarinnar, sem umferðarsérfræðingar hennar unnu og sendu umhverfisráðherra árið 2011, að óhöppum og slysum myndi fækka um 11 á ári með Húnavallaleiðinni. Enginn kostnaður liggur fyrir en segir hann að framkvæmdin myndi eflaust borga sig upp á örfáum árum.

„Fyrir rúmlega 10 árum var áætlað að kostnaðurinn væri 2,5 til 3 milljarðar og talað um að framkvæmdin myndi borga sig upp fyrir samfélagið á 4 til 5 árum. Ég efast um að það sé mikil breyting á því hversu lengi framkvæmdin væri að borga sig, mikilvægi verkefnisins vex með hverju ári með aukinni umferð,“ segir Njáll og bætir við:

„Í samanburði við Sundabraut þá er talið að arðsemin af henni sé 10%, sem þykir gott. En arðsemin af þessari framkvæmd yrði enn meiri eða öðru hvorum megin við 20%.“

Lengi kallað eftir vegstyttingu

Njáll segir að vegstytting sé liður í því að styrkja atvinnulífið. 

„Íbúar og atvinnulífið við Eyjafjörð og hér austur um hefur lengi kallað eftir vegstyttingum og bættu umferðaröryggi á leiðinni til Reykjavíkur, Húnavallaleið, ásamt fleiri góðum verkefnum eins og Sundabraut, gegna mikilvægu hlutverki ef á að nást árangur á þessu sviði," segir hann og bætir við:

„Það þekkja allir að til að styrkja atvinnulífið þá þarf alltaf að leita leiða til að ná niður flutningskostnaði og styrkja samkeppnishæfni þess,“ segir Njáll að lokum.

Frétt af mbl.is

Fór ráðherrann framhjá vegalögum?