Viðbragðstíminn styttist umtalsvert

Viðbragðstími þyrlusveitar Landhelgisgæslunnar styttist umtalsvert um helgina með því að kalla þyrlur stofnunarinnar bæði út frá Akureyri og Reykjavík.

Svo segir í tilkynningu frá Landhelgisgæslunni en undanfarnar tvær helgar hefur Gæslan gert þyrlur stofnunarinnar út frá mismunandi stöðum á landinu. Um verslunarmannahelgina voru þyrlurnar gerðar út frá Akureyri og Vestmannaeyjum og um liðna helgi var þyrlusveitin kölluð út frá Reykjavík og Akureyri.

Sjö útköll um helgina

Þyrlusveitin annaðist sjö útköll um helgina og var þrívegis kölluð út frá Akureyri vegna slysa.

Frétt af mbl.is

Sjö útköll borist þyrlusveitum það sem af er helgi

Bifhjólaslys urðu á föstudags og laugardagskvöldi á svipuðum slóðum á hálendinu. Annað varð austur af Herðubreið og hitt norður af Vatnajökli. Í tilkynningu segir að viðbragðstími vegna þessara tveggja slysa styttist um klukkustund með því að kalla þyrluna út frá Akureyri. Þeir sem slösuðust voru báðir fluttir á Sjúkrahúsið á Akureyri. 

Á meðan þyrluáhöfnin, sem stödd var á Akureyri annaðist útkall vegna bifhjólaslyssins á laugardagskvöld, var hin þyrluvaktin, sem stödd var í Reykjavík, kölluð út í Flatey vegna slyss sem þar varð.

Frétt af mbl.is

Alvarlega slasaður eftir bílveltu

Þá varð alvarlegt umferðarslys á Ólafsfjarðarvegi aðfaranótt sunnudags og var þyrlan stödd á Dalvík þegar útkallið barst. Í tilkynningunni segir að áhöfn hennar gat brugðist við með skjótum hætti. Sá sem slasaðist var einnig fluttur á Sjúkrahúsið á Akureyri.

„Útgerð þyrlanna frá Akureyri og Vestmannaeyjum undanfarnar tvær helgar gekk vonum framar og stytti viðbragðstíma. Líkur eru á að framhald verði á þessu tilraunaverkefni Landhelgisgæslunnar yfir fjölmennar ferðahelgar,“ segir að lokum 

• Blogga um frétt