Segir MAST birtast eins og nátttröll

Bjarni Jónsson, þingmaður Vinstri grænna og formaður utanríkismálanefndar, segir nýja gjaldskrárhækkun Matvælastofnunar ganga þvert gegn markmiðum um nýsköpun og tekjumöguleika til sveita. Þetta kemur fram í færslu Bjarna á Facebook fyrr í dag. 

Hækkunin bregði fæti fyrir gott starf

„Hér birtist Mast, ekki í fyrsta skipti þegar heimavinnsla á mat er annars vegar, sem algjört nátttröll. Hér er verið að bregða fæti fyrir það góða starf sem víða er verið að vinna og stofnunin ætti þess í stað að vinna með og aðstoða eins og hlutverk slíkrar stofnunar á að vera,“ segir Bjarni meðal annars í færslunni.

Þá segir Bjarni að á undanförnum árum hafi borið á mikilli grósku í fjölbreyttri heimavinnslu á mat beint frá býli sem og tilkomu örsláturhúsa sem þjóni einstökum býlum eða nærsamfélaginu til frekari fullvinnslu á afurðum og virðisauka. 

Hafi sú þróun hleypt nýju lífi í byggðir víða og stuðlað að spennandi nýsköpun og tekjumöguleikum til sveita. Loks hvetur Bjarni til þess að gripið verði í taumana og stofnunin rétt af með þeim hætti að hún vinni með en ekki gegn nýsköpun og fjölbreyttri heimavinnslu.

Hægt er að sjá færslu Bjarna í heild sinni hér fyrir neðan. 

• Blogga um frétt