Fagna ákaft ákvörðun Svandísar

„Eins og gefur að skilja fögnuðum við ákaft þegar við lásum yfirlýsingu Svandísar á Facebook-síðu hennar. Þetta sýnir okkur og sannar að það borgar að láta í sér heyra og mótmæla kröftuglega í málum sem þessum sem er einmitt megintilgangurinn með samtökum eins og okkar. Þetta er mikill léttir og gefur meiri fyrirsjáanleika inn í sláturtíðina.“

Þetta segir Oddný Anna Björnsdóttir, fram­kvæmda­stjóri Beint frá býli og Sam­taka smáfram­leiðenda matvæla á Íslandi, eftir að Svandís Svavarsdóttir matvælaráðherra fullyrti fyrr í dag að ekkert yrði af hækkun gjaldskrár Matvælastofnunar, í bili að minnsta kosti.

„Undanfarna daga hefur verið rætt um mögulega hækkun á gjaldskrá Matvælastofnunar og hugsanleg áhrif þeirrar hækkunar. Af því tilefni vil ég taka fram að ég hef ekki staðfest hækkun á gjaldskrá og hyggst ekki gera það að svo stöddu,“ segir meðal annars í yfirlýsingu Svandísar.

Frétt af mbl.is

Ákvörðun um hækkun liggur hjá ráðuneytinu

Eftirlit mögulegt með myndavélum

Oddný Anna Björnsdóttir fagnar tíðindunum og segist vona að rafrænt eftirlit með slátrun verði möguleiki. Ljósmynd/Aðsend

Oddný Anna spyr hvort ekki séu tækifæri til að hagræða, til dæmis með nútímatækni, til að koma í veg fyrir að þessi hækkun verði gerð í framtíðinni.

Þar bendir hún á að meðal annars væri mögulegt að hafa eftirlit í gegnum myndavélabúnað, sérstaklega í minni sláturhúsum.

„Nú vonum við bara að ráðherra vinni með MAST að því að innleiða rafrænt eftirlit, að minnsta kosti í minni sláturhúsum, og byggja meira á áhættumati og innra eftirliti.“

Þá segir hún að nauðsynlegt sé að vera vakandi yfir því hvort tilteknir hlutar eftirlits séu nauðsynlegir og stuðli í raun að auknu matvælaöryggi og dýravelferð.

• Blogga um frétt