Réttum megin við núllið tveimur árum á undan áætlun

Bjarni Benediktsson fjármálaráðherra segist hafa væntingar til þess að það takist að snúa fjárlagahalla ríkissjóðs við tveimur árum fyrr en áður hafði verið áformað. Vegna faraldursins varð mikill halli á rekstri ríkisins með tilheyrandi skuldasöfnun, en Bjarni segist nú vænta þess að hægt verði að loka hallanum fyrir lok kjörtímabilsins, eða fyrir lok ársins 2025.

Í vor þegar fjármálaáætlun ríkisstjórnarinnar fyrir árin 2024-2028 var kynnt kom fram að gert væri ráð fyrir hallalausum ríkissjóði árið 2027.

Í samtali við mbl.is eftir kynningarfund um stöðu ríkisfjármála og áforma um aukna hagræðingu í ríkisrekstri sagði Bjarni að þessi bætta staða ríkissjóðs væri til komin vegna þess að aukin umsvif í efnahagskerfinu væru farin að skila sér með sterkum hætti inn í tekjustofnana. Bæði ætti það við um tekjuskatt einstaklinga og með auknum virðisaukaskattstekjum.

Núverandi spá sem Bjarni setti fram gerir nú ráð fyrir um 40 milljarða hallarekstri á þessu ári og að afkoman á næsta ári verði enn betri og svo að hallalausum rekstri verði náð árið 2025. Ítrekar hann jafnframt að tekist hafi að ná 200 milljarða afkomubata fyrir ríkissjóð á tveimur árum, miðað við það sem áður hafði verið spáð.

Hann segir að nánar verði farið ofan í þessar tölur við kynningu á fjárlagafrumvarpinu strax í næsta mánuði og við útgáfu fjármálaáætlunar í vor.  „En ég sé fram á það að þetta gefi okkur færi að loka fjárlagahallanum mun fyrr og ég hef væntingar um að við lokum hallanum á þessu kjörtímabili,“ segir Bjarni.

• Blogga um frétt