Kærunefnd ógildir útboð um loftmyndir af Íslandi

Kærunefnd útboðsmála hefur ógilt útboð Ríkiskaupa um öflun loftmynda, fyrir hönd umhverfis-, orku- og loftslagsráðuneytisins.

Frétt af mbl.is

Stöðvuðu útboð á myndatöku af Íslandi

Ríkiskaupum er þar með gert að bjóða innkaupin út að nýju með lögmætum hætti auk þess sem ráðuneytinu og Ríkiskaupum er gert að greiða Loftmyndum ehf. milljón krónur í málskostnað, en fyrirtækið Loftmyndir kærði útboðið til kærunefndarinnar.

Útboðið miðaði að því að koma á fót gagnvirku innkaupaferli fyrir stafræna loftmyndatöku af Íslandi.

Í rökstuðningi kærunefndarinnar fyrir ógildingunni kemur fram að ósamræmi hafi verið á milli skilmála lokaðs útboðs og þess sem auglýst var á fyrri stigum. Á fyrri stigum var áhugasömum gert að skila inn þátttökubeiðni, en þeir sem skiluðu inn slíkri beiðni fengu síðan aðgang að lokuðu útboði innan gagnvirka innkaupakerfisins.

Í kjölfar þess að hafa auglýst eftir þátttökubeiðnum og móttekið tilboð í lokuðu útboði innan kerfisins var skilmálum útboðsins breytt í verulegum atriðum. Taldi kærunefndin þessar breytingar í andstöðu við meginreglur útboðsréttar um jafnræði og gagnsæi enda ekki hægt að útiloka að fleiri fyrirtæki hefðu tekið þátt í útboðinu ef breytingarnar hefðu verið gerðar á fyrri stigum.

Af þessum ástæðum auk annarra sem raktar eru í úrskurðinum komst kærunefnd útboðsmála að þeirri niðurstöðu að svo verulegir annmarkar hefðu verið á útboðinu að óhjákvæmilegt væri að fallast á kröfur kæranda um að útboðið yrði ógilt og þar með lagt fyrir Ríkiskaup að bjóða út að nýju.