Innlent | mbl | 31.8.2023 | 10:30 | Uppfært 10:47

Silfrið mun snúa aftur

Silfrið hefur fyrir löngu skipað sér fastan sess sem hringiða þjóðmálaumræðu á Íslandi og hefur verið afurð fleiri en eins fjölmiðils, vefmiðla sem sjónvarps, síðan það hóf göngu sína á Skjá einum árið 1999. Skjáskot/RÚV

„Það er gripið úr lausu lofti,“ segir Skarphéðinn Guðmundsson, dagskrárstjóri Ríkisútvarpins, í samtali við mbl.is um hinn rótgróna þjóðmálaþátt Silfrið sem ekki sést á haustdagskrá stofnunarinnar í fljótu bragði.

Fjallar Samstöðin um þetta meinta messufall undir fyrirsögninni Þingið kallað saman 12. september – en ekki Silfrið og bendir á að vaninn hafi verið að Silfrið hæfi göngu sína um svipað leyti og þing er kallað saman að hausti.

Unnið að breytingum

„Það er einfaldlega þannig að Silfrið er ekki komið á dagskrá vegna þess að akkúrat þessa dagana erum við að vinna að því að gera ákveðnar breytingar á Silfrinu sem er kannski ekki alveg tímabært að segja frá hverjar verða,“ heldur dagskrárstjóri áfram og bætir því við að vegna breytinganna sé óvíst að Silfrið verði á sama stað í dagskrá.

„Silfrið mun sannarlega snúa aftur síðari hluta september þegar það liggur fyrir í hvaða mynd við viljum hafa það, þetta [töfin á Silfri haustsins] er vegna skipulagsmála og Silfrið mun snúa aftur, vonandi sterkara fyrir vikið, það hefur verið á sama tíma í mörg ár og með sama sniði og nú er bara kominn tími til að hrista aðeins upp í þættinum,“ segir Skarphéðinn Guðmundsson að lokum af málefnum Silfursins.