Innlent | mbl | 14.9.2023 | 17:31

Ný fjárlög ráðstafi minna fé í umhverfismál

Andrés Ingi Jónsson, þingmaður Pírata. mbl.is/Eggert Jóhannesson

Andrés Ingi Jónsson, þingmaður Pírata, segir að framlög til umhverfis- og orkumála verði í raun lækkuð samkvæmt nýjum fjárlögum, þvert á það sem fram kemur í sjálfu frumvarpinu.

Nýtt fjárlagafrumvarp var til umræðu á Alþingi í dag en í frumvarpinu segir að framlag til orku- og umhverfismála hafi aukist um 5,8 milljarða frá því í fyrra. Andrés segir að ekki sé tekið tillit til lækkunar á ívilnun á rafbílakaupum en bein framlög séu minni en í fyrra sé ívilnun tekin inn í reikningin.

„Ríkisstjórn Katrínar Jakobsdóttur er ekki að fara í rétta átt í loftslagsmálum. Hér er verið að draga saman bein framlög til umhverfis og orkumála um 1,7 milljarð króna,“ sagði hann á Alþingi í dag. „Það er verið að minnka ívilnun til kaupa á hreinorkubílum um 4,8 milljarða, án þess að sá peningur sé síðan notaður í eitthvað annað.“

Frétt af mbl.is

Verðbólgan hafi verið vanmetin

Ríkisstjórnin „hálfdrættingur“ miðað við það sem hún segist vera

„Það er alveg hægt að hætta því að styrkja fólk hægri vinstri til að kaupa Teslur og nýta peninginn í eitthvað sem skilar meiri samdrætti í losun gróðurhúsalofttegunda. En það er ekki gert.“

Sagði hann að samkvæmt bráðabirgðaútreikningum Umhverfisstofnunnar sé ríkisstjórnin „hálfdrættingur á við það sem hún segist ætla að vera“. Þá benti hann á að samdráttur í losun fyrir árið 2030 stefni í 24% en að ríkistjórnin segist ætla að draga úr losun um 55%.

„Ríkisstjórnin er einmitt ekki að stefna í rétta átt. Losun jókst á seinustu þremur árum, fyrir utan á síðasta ári, sem hún stóð í stað,“ sagði Andrés.