Skora á ríkisstjórnina að veita tímabundinn styrk

Byggðaráð Norðurþings skorar á ríkisstjórn Íslands að veita tímabundinn styrk svo að áætlunarflug til Húsavíkur leggist ekki niður. Í fundargerð byggðaráðs, sem fundaði í morgun, eru fyrri bókanir ráðsins ítrekaðar um mikilvægi reglulegs áætlunarflugs um Húsavíkurflugvöll. 

Eins og mbl.is greindi frá í gær ætlar flugfélagið Ernir að leggja niður áætlunarflug til Húsavíkur um næstu mánaðarmót. Til skoðunar er að halda fluginu áfram ef ríkisstyrkur berst vegna flugleiðarinnar. 

Frétt af mbl.is

Hætta flugi til Húsavíkur að öllu óbreyttu

„Flugið skipar mikilvægan sess í atvinnuuppbyggingu í Þingeyjarsýslum sem framundan er með tilkomu Grænna Iðngarða á Bakka, tvöföldun Þeistareykjavirkjunar, landeldi á svæðinu og ferðaþjónustu sem er ein stærsta atvinnugreinin á svæðinu. Enn fremur er flugið mikilvægt fyrir íbúa sem þurfa að sækja þjónustu á höfuðborgarsvæðið, s.s. heilbrigðisþjónustu og vegna atvinnusóknar,“ segir í bókun byggðaráðs.

• Blogga um frétt