Laugardalslaug lokað tímabundið

Laugardalslaug verður lokað tímabundið vegna viðhalds sem staðið hefur til í nokkurn tíma.

Áætlaður framkvæmdatími er tvær vikur og verður sundlauginni lokað frá þriðjudeginum í næstu viku, að því er fram kemur í tilkynningu borgarinnar. Óvissuþættir gætu þó haft áhrif á framkvæmdatímann.

Sundæfingar og skólasund helst þó óbreytt þrátt fyrir lokunina en á meðan er krökkum í skólasundi og iðkendum bent á að nota gömlu afgreiðsluna, þar sem þeirri nýju verður lokað. Þá verður sömuleiðis opið hjá nuddaranum sem starfar í Laugardalslaug.

„Viðhaldslokun á útilaugarkeri Laugardalslaugar er löngu tímabær en langt er liðið frá síðustu viðhaldslokun,“ er haft eftir Árna Jónssyni, forstöðumanni Laugardalslaugar.

„Fara þarf í endurbætur á hluta af kýraugum í laugarkeri, koma fyrir þili á milli laugarkera, fara í endurbætur á yfirfallslögn, lagfæringar á flísalögn og ýmis önnur viðhaldsverkefni. Jafnframt verður unnið að ýmsum þrifum sem ekki er hægt að komast í þegar gestir eru í lauginni.“

Nánar um helstu verkliði í Laugardalslaug:

• Kýraugu- skipta út að minnsta kosti 15 kýraugum í laugarkeri.
• Þil á milli laugarkera- fjarlægja þil og setja upp nýtt þil undir brú. Með því að aðskilja laugarker með þili eru bundnar vonir við að auðveldara verði að hækka hitastig barnalaugar.
• Yfirfallsrenna í öllu laugarkeri- hreinsun á rennu með háþrýstiþvotti, viðgerð á rennunni og leki stoppaður á yfirfallslögn þar sem það á við.
• Lendingarlaug- málun og lagfæringar.
• Laugarker- lagfæringar á flísum.
• Sjópottur- áhersla á að fylla í flísalögn með fúgu og hreinsa pottinn vel.
• Aðrir pottar- hreinsun.

• Blogga um frétt