Eimskip „fullmeðvitað“ um mögulegar afleiðingar
Setja bókamerki
Lögmaður Samskipa segir ákvörðun fyrirtækisins um að sækja bætur á hendur Eimskipi rökrétt framhald á sátt Eimskips við Samkeppniseftirlitið. Ákvörðun Eimskips hafi nú þegar valdið Samskipum töluverðu fjárhagslegu tjóni og ætti það að hafa verið ljóst fyrir Eimskip hvaða áhrif þessi sátt myndi hafa á samkeppnisaðilann sinn, Samskip.
„Þeir eru með mjög alvarlegum hætti, að okkar mati, að saka Samskip um ólögmæta, og eftir atvikum refsiverða háttsemi. Sú staðreynd að þeir hafi gert það er eitthvað sem er til þess fallið að valda tjóni og búsifjum í rekstri félagsins í heild sinni. Við ætlum að láta reyna á það hvort að keppinautur félagsins geti komist upp með athöfn af þessum toga,“ segir Hörður Felix Harðarson, lögmaður Samskipa, í samtali við mbl.is.
Eins og mbl.is greindi frá fyrr í dag þá hefur Samskip falið Mörkinni lögmannsstofu að sækja bætur á hendur Eimskipi vegna meintra ólögmætra og saknæmra athafna félagsins gagnvart Samskipum.
Eimskip hafi í sátt við Samkeppniseftirlitið (SKE) lýst því yfir að félagið hafi átt í samráði við Samskip sem efnt hafi verið til á fundi 6. júní 2008 og í framhaldi þess fundar.
Þegar valdið Samskipum fjárhagslegu tjóni
Nú er Samskip að leitast eftir viðurkenningu á bótaskyldu Eimskips án fjárhæðar. Hörður segir það mjög einfalt mál að sýna fram á það tjón sem Eimskip á að hafa valdið Samskipum sem afleiðing af sátt Eimskips.
„Þú þarft ekki að leita lengra en bara í það hvaða stöðu Samskip er núna í varðandi útgjöld og vinnu starfsmanna sem fer í það að verjast þessum röngu ásökunum sem Eimskip hefur stuðlað að með að koma með þessar staðhæfingar. Auðvitað er tjónið samt miklu umfangsmeira en bara það því þetta hefur verulega áhrif á reksturinn, viðskiptavini og lánveitendur. Þetta hefur bara áhrif víða,“ segir Hörður.
Spurður hvort Eimskip hafi gert þessa sátt með það í huga að það myndi skaða Samskip, í ljósi þess að hann minnist reglulega á það að fyrirtækin séu samkeppnisaðilar, segir hann svo ekki vera.
„Ég er ekki að ýja að því að þetta hafi verið viljandi gert en ég held hins vegar að þeir hafi verið fullmeðvitaðir um hvaða afleiðingar þetta gæti haft. Það sem ég tel að þeir hafi líka verið meðvitaðir um er það að yfirlýsingarnar í þessari sátt eru um grundvallaratriðin í henni. Það er að segja að þetta samráð sem á að hafa komist á á fundi 6. Júní, eða í framhaldi hans, eru rangar,“ segir Hörður og bætir við:
„Ég er með bæði gögn í höndunum og yfirlýsingar félagsins sjálfs um það efnis sem ég tel að séu einfaldlega réttar. Það að fara fram með svona yfirlýsingar hefur náttúrulega afleiðingar. Þeir geta ekki lýst þessu yfir og sakað Samskip um einhverja háttsemi af þessum toga án þess að það hafi afleiðingar."
Segir SKE hafa farið offari
Hörður segir ekki hægt að mæla það hversu mikið ákvörðun Eimskipa um að gera sátt við SKE hafði áhrif á lokaniðurstöðu eftirlitsins, en að ákvörðunin hafi augljóslega vegið þungt.
„Ég held að sú ábyrgð sé talsverð því auðvitað skiptir það máli fyrir eftirlitið að annar aðilinn í ætluðu samráði stígi fram og viðurkennir sök eins og þarna var gert. En auðvitað ætti eftirlitið eftir sem áður að horfa til gagna málsins og skýringanna sem fram hafa komið, en þeir gera það ekki og styðjast við sáttina til að réttlæta þessa ákvörðun.“
Hörður segir það ekkert launungarmál að Samskip telji að SKE hafi farið offari með ákvörðun sinni. Öll framsetning þeirra sé „fullkomlega skert allri hlutlægni og meðferð málsins í heild bara mjög alvarleg og ábótavant“.
„Það leiðir til niðurstöðu sem við vitum að er efnislega ekki rétt,“ segir Hörður.
Málsmeðferðin verður í lengra lagi
Í tilkynningu frá Samskipum fyrr í dag kom fram að Samskip hefði skilað inn til áfrýjunarnefndar samkeppnismála kæru vegna ákvörðunar SKE frá 31. ágúst síðastliðnum um að leggja á Samskip 4,2 milljarða króna sekt fyrir þátttöku í meintu samráði við Eimskip. Þar er þess krafist að ákvörðun SKE verði felld úr gildi.
Nú tekur því við málsmeðferð hjá áfrýjunarnefndinni og telur Hörður að sú málsmeðferð verði í lengri kantinum og taki að lágmarki nokkra mánuði.
Ertu bjartsýnn?
„Já ég er mjög bjartsýnn," segir Hörður að lokum.
Erlendir miðlar greina frá tíunda gosinu
Mjög alvarlegt ef Njarðvíkuræð gefur sig
Hraunið náð Njarðvíkuræð: Fylgjast með raflínu
Mæðgur dæmdar til að greiða 64 milljónir
Búseta skortir byggingarlóðir
Virknin dregist saman um 600 metra
Hluti bílastæðis undir hraun: Ómögulegt að meta tjón