Tveggja daga opinberri vinnuheimsókn Þórdísar Kolbrúnu Reykfjörð Gylfadóttur utanríkisráðherra til Eistlands lauk í gær. Meðal annars skoðaði hún uppsetningu á færanlegu neyðarsjúkrahúsi sem kostað er af íslenskum stjórnvöldum og verður afhent Úkraínu í nóvember, en sjúkrahúsið er hannað og framleitt í Eistlandi.

Á vef Stjórnarráðsins er greint frá því að Þórdís Kolbrún fundaði með Margus Tsahkna utanríkisráðherra og Hanno Pevkur varnarmálaráðherra. Auk þess kynnti ráðherra sér starfsemi netöryggisseturs Atlantshafsbandalagsins í Tallin. 

Þórdís Kolbrún og Pevkur. Ljósmynd/Stjórnarráðið

„Tvíhliða samskipti ríkjanna, stuðningur við Úkraínu, þróun öryggismála og vaxandi samvinna Norðurlandanna og Eystrasaltsríkjanna voru efst á baugi á fundi Þórdísar Kolbrúnar Reykfjörð Gylfadóttur utanríkisráðherra með utanríkisráðherra Eistlands,“ segir í tilkynningunni. 

Þórdís Kolbrún og Pevkur heimsóttu borgina Tartu þar sem unnið er að uppsetningu færanlega neyðarsjúkrahússins. 

„Sjúkrahúsið mun koma að góðum notum við að bjarga lífum og lina þjáningar þeirra sem leggja líf sitt og heilsu undir til þess að verja Úkraínu gegn rússneska innrásarliðinu. Við erum þakklát fyrir að geta með þessum hætti stutt við réttmæta varnarbaráttu Úkraínu, en því fylgir auðvitað sorg að hugsa til þess óréttlætis sem úkraínska þjóðin sætir af hendi Rússlands. Við höfum unnið að þessu verkefni í framúrskarandi samstarfi við Eista og Þjóðverja, en þeir leggja til ökutæki til að flytja sjúkrahúsið milli staða, en það er mjög stórt framlag, sem við erum þakklát fyrir,“ er haft eftir Þórdísi Kolbrúnu. 

Á næstu vikum hefst þjálfun fyrir teymi frá Úkraínu, sem kemur til með að reka spítalann. 

Tengdar fréttir

Úkraína

Eldflaugavarnarkerfi í skiptum fyrir hermenn

• Rússar sagðir útvega N-Kóreu milljón olíutunnur
• Segir að friði verði aðeins náð með afli
• Hótar Bretum og Bandaríkjamönnum
• Segir að Rússar séu að nota Úkraínu sem tilraunasvæði

» Fleiri tengdar fréttir

• Blogga um frétt