Gæsluvarðhald yfir konu, sem situr í varðhaldi vegna rannsóknar lögreglu á andláti karlmanns á sextugsaldri í fjölbýlishúsi við Bátavog, hefur verið framlengt um tvær vikur, eða til 18. október.
Þetta kemur fram í tilkynningu lögreglunnar á höfuðborgarsvæðinu.
Konan, sem er um fertug, var handtekin á vettvangi og var úrskurðuð í gæsluvarðhald. Átti gæsluvarðhaldsúrskurður að renna út í dag, 4. október.
Ævar Pálmi Pálmason, aðstoðaryfirlögregluþjónn hjá miðlægri rannsóknardeild lögreglunnar á höfuðborgarsvæðinu, sagði í samtali við mbl.is í gær að allt benti til þess að manninum hefði verið ráðinn bani.