Innlent | mbl | 11.10.2023 | 16:55

„Ekki bæði hægt að eiga kökuna og éta hana“

Jóhann Páll Jóhannsson, þingmaður Samfylkingarinnar. mbl.is/Árni Sæberg

Óvissan sem núna er uppi í kjölfar afsagnar Bjarna Benediktssonar sem fjármála- og efnahagsráðherra er skaðleg, sérstaklega vegna víðsjárverðra tíma í efnahagslífinu. Ekki dugar heldur að Bjarni fari úr einum ráðherrastól í annan.

Frétt af mbl.is

Axlar ekki ábyrgð með því „að skipta um stól“

Þetta sagði Jóhann Páll Jóhannsson, þingmaður Samfylkingarinnar, í samtali við blaðamann á Alþingi í dag. Hann sagði Bjarna hafa verið mjög ábúðarfullan er hann tilkynnti að hann hefði ákveðið að axla ábyrgð og segja af sér.

Pottur alvarlega brotinn

„Þá gerði maður ráð fyrir því að þar með ætlaði hann að axla ábyrgð á misgjörðum við sölu á eignarhlut ríkisins í Íslandsbanka, axla ábyrgð á því sem hefur komið fram og þrír eftirlitsaðilar hafa staðfest í sínum úttektum að potturinn var alvarlega brotinn við söluna á Íslandsbanka, lögum og reglum var ekki fylgt í hvívetna og það er Bjarni Benediktsson sjálfur sem ber ábyrgð á því sem ráðherra, sem vörslumaður ríkiseigna að tryggja að lögum sé fylgt og markmið laga um sölu ríkisins á eignarhlut í fjármálafyrirtækjum,” greindi Jóhann Páll frá og kvaðst hafa dregið þá ályktun að Bjarni myndi segja af sér ráðherradómi.

Bjarni Benediktsson á þingflokksfundi Sjálfstæðisflokksins í dag. mbl.is/Eyþór

Ekki nóg að skipta um skrifstofu

„En nú heyrist mér að standi frekar til að hann skipti um skrifstofu. Það er tvennt ólíkt að axla pólitíska ábyrgð á misgjörðum, sem getur verið lofsvert og sjálfsagt þegar hlutirnir sem hafa farið úrskeiðis eru mjög alvarlegir. Annað hvort axlarðu ábyrgð eða ekki, það er ekki bæði hægt að eiga kökuna og éta hana,” sagði hann og nefndi að núna væri það stjórnarmeirihlutans að meta hvort Bjarna væri treystandi áfram fyrir verkefnum eftir það sem á undan er gengið.

Skaðleg óvissa

Að mati Jóhanns Páls er óvissan sem núna ríkir eftir afsögn Bjarna skaðleg, sérstaklega vegna viðsjárverðra tíma í efnahagslífinu. Þar nefndi hann 8% verðbólgu, það að kaupmáttur ráðstöfunartekna hefði rýrnað tvö ár í röð og að vextir Seðlabankans væru 9,25%. Staðan væri því mjög alvarleg, m.a. vegna afar þensluhvetjandi ríkisfjármálastefnu sem hefði sérstaklega undanfarin tvö ár verið rekin á vakt Bjarna.

Bjarni Benediktsson er hann sagði af sér embætti í gærmorgun. mbl.is/Kristinn Magnússon

„Við erum að sigla inn í mjög krefjandi kjarasamninga þannig að öll óvissa um hvað tekur við getur verið mjög skaðleg. Nú þarf ákveðna festu í hlutina. Við erum með fjárlög hér til umfjöllunar á þinginu þar sem ráðherrum eru settar verulegar skorður og benda ítrekað á fjármálaráðherra og í raun segja að þeir fái ekki peninga til að trygga að stofnanir geti sinnt lögbundnum verkefnum,“ bætti þingmaðurinn við.

„Núna vitum við ekki einu sinni hver sá ráðherra er eða hvað tekur við, hvort sá sem tekur við muni skipta um kúrs að einhverju leyti eða fylgja áfram þessari skaðlegu efnahags- og ríkisfjármálastefnu sem hefur verið rekin á vakt Bjarna Benediktssonar,” sagði hann.